Fluxx

Fluxx estas kartludo kreita de usono Andrew Looney kaj disdonita en ties angla versio per sia firmao Looney Labs. La nomo Fluxx devenas de la angla vorto flux, esperante fluoflukso, do estas memevidente ke la ludo temas pri ŝanĝoj. Specife, oni povas pli-malpli ŝanĝi la regulojn kaj celo de la ludo per la ludado de kartoj. En la angla haveblas diversajn versiojn: la originala Fluxx, Zombie Fluxx (Zombia Fluxx), Martian Fluxx (Marsa Fluxx), Pirate Fluxx (Pirata Fluxx) kaj tiel plu. Oficialaj tradukoj de la originala eldoniĝis en diversaj lingvoj kiel la germana, la nederlanda kaj la japana. Ankaŭ ekzistas neoficiala adapto de la ludo al Esperanto, kiu troviĝas sube.

Koncepto kaj Reguloj

La karto “Bazaj Reguloj” montras la regulojn de la ludo: por komenci oni miksas la kartojn kaj disdonas po 3 al ĉiu ludanto. Je ties vico ĉiu ludanto devas preni unu karton de la talono kaj ludu unu karton kaj faras tion, kio estas skribita sur ĝi.

Ago-Kartoj

Angle Action, tiuj estas la plej simplaj kartoj: oni simple faras la priskribitan agon kaj metas la karton sur la forĵetŝtaplon.

Tenaĵo-Kartoj

Angle Keeper, tiuj kartoj montras aferon kiun oni povas “posedi”: por ludi la karton oni metas ĝin sur la tablon antaŭ si, kaj de tiu momento “havas” tiun tenaĵon - se la karto daŭre estas tenita en la mano, oni ne “havas” ĝin laŭ la reguloj.

Celo-Kartoj

Angle Goal, tiuj kartoj indikas eblajn celojn de la ludo. Ĝenerale nur povas esti unu celo, do se iu celo-karto jam estas ludata, oni forĵetas ĝin. La nune valida celo-karto indikas tion, kion oni devas fari por venki: ĉefe temas pri tenaĵoj, kiun oni devas havi antaŭ si. Tuj, kiam ekzakte unu ludanto havas la ĝustajn tenaĵojn aŭ alie plenumas la kondiĉojn de la celo, tiu venkas.

Regulo-Kartoj

Angle New Rule (Nova Regulo), tiuj kartoj reprezentas la diversajn regulojn de la ludo. Ludante Regulon oni metas ĝin sur la mezon de la tablo kaj forĵetas jam-ludita(j)n regulo(j)n, kiu(j)n ĝi kontraŭdiras, ekzemple se “Prenu 4” jam estas sur la tablo kaj mi ludas “Prenu 2”, mi forĵetas “Prenu 4”. Tiujn regulojn oni devas sekvi ekde tiam, kiam ili estas ludataj. Do se ankoraŭ ne estas “Ludo”-regulo sur la tablo kaj mi ludas “Ludu 3”, mi rajtas ludi du pliajn kartojn dum mia vico, ktp.

Taktiko

Kvankam Fluxx estas tre hazarda ludo, ja ekzistas taktiko, kiu temas ĉefe pri la ĝustatempa ludo de la kartoj. Ekzemple se mi ludas “Manlimo 1”, ĉiuj ludantoj krom mi devas forĵeti ĉiujn kartojn krom unu, kaj ĝenerale tenas bonan karton. Se mi tuj poste povas ludi “Impostoj”, ili devas doni tiujn bonajn kartojn al mi! Tamen avertu ke mi ankaŭ bezonas forĵeti la manliman regulon antaŭ la fino de mia vico (ekzemple per “Sen Limoj” aŭ “Regulo-reŝargo”) por ke ankaŭ mi ne devas forĵeti la kartojn!

Fluxx en Esperanto

Fluxx jam plurfoje ludiĝas ĉe Esperanto-aranĝoj, kaj kelkaj homoj ankaŭ prezentis siajn tradukojn de la ludo. Ĉi tie prezentiĝas nova versio kreita de Thomas Preece kaj Neil Roberts. Ĝi ne estas rekta traduko de iu ajn oficiala Fluxx-varianto sed nova varianto kiun ni mem kreas, kiu estas adaptita al Esperanto-kulturo; ĝi enhavas ne nur kartojn de la originala kiel “Akvo”, “Cerbo” kaj “Amo” sed ankaŭ Esperanto-temajn kiel “Krokodilo”, “Akvobatalooooo!” kaj “I S”, do estas aparte bona por ludi dum kongresoj.

Elŝutu la kartaron de Esperanto-Fluxx

Se vi ŝatas la ludojn, bonvolu sciigi nin, kaj ankaŭ bonvolu subteni Looney Labs kaj ties originalan Fluxx-ludon! Informoj pri la oficiala ludo haveblas ĉe ties retejo, kaj vi sendube povas aĉeti ĝin en via loka lud-vendejo.


Copyright © Thomas Preece 2012. This work is licensed under a Creative Commons Attribution-ShareAlike 3.0 Unported unless otherwise stated.